次日清晨，丸子人的心臟再一次被考驗，結果證實他的心臟還是很強。如果有人朝早醒來，看到除了房間以外所有東西也變成啡色，原來除房間外所有東西都被蓋上陶瓷，他還可以如常的梳洗；還不止這樣，氣溫還突然急升，真的到了站着也快熟的程度，也是因為有人在他家的廚房燒陶。而最大問題是，他也不知道正在燒陶的究竟算不算是個人。如果有人遇上以上情況還有心情吐糟，那他一定是丸子人。
「你整碗唔駛搞到自己咁下化？仲有你邊到搵咁多陶泥返嚟？你有咁多嘢仲駛咪喺我度打工啫？你去買泥都夠食啦！」
原來燒陶那個人正是ok俠，他全長上下也被陶泥封着，不說還以為有新人物泥漿人登場。
「唔……唔……」ok俠好像有東西想說，可是嘴被封了不能說。
丸子人以手按着ok俠的口：「你唔乜鬼嘢呀？仲有你唔會諗住用呢個咁嘅爛鬼爐可以燒到陶掛？如果你真係喺度燒到陶，我會變舊灰，你會變隻豬囉。」順手除去ok俠手咀上的泥。
「吐…吐…冇錯，我發現呢個爐個溫度係唔夠嘅，不過你放心我已經諗到解決方法。」ok俠會不會真的是隻豬。
丸子人被脫力：「算喇，你唔好再搞喇！快啲同我清理好現場。」
「差少少就得嘅喇，你信我喎。」ok俠又拍心口。
「你……」其實丸子人今天已經很醒的了，可能是因為怒火，不過還是沒有辦法對付ok俠。
這個時候，一舊龐然大物由左至右的將ok俠打飛：「對付非常人，要用非常嘅方法先得嘅。」那人說完還托一托眼鏡。
這個人很魁梧，不，與其說魁梧，不如說很累贅。因為那人身穿一件大衣，但不用透視眼也可以看到，大衣中藏着很多東西。
丸子人一眼便看出了他是誰，關鍵就在他的眼鏡。那人在自己眼鏡左邊貼上「字」字，右邊貼上「典」字，若這個不是字典俠，我也不知道他是誰。
「你又攪咩？做乜攪到咁？」丸子人被鍛鍊到處變不驚的地步。
字典俠轉個靚pose：「呢個先至係我嘅真面目。」
丸子人心想：乜而家啲異能人咁痴線嘅，諗計趕佢地走先得。
「咁你打暈左佢，啲嘢邊個執？」
字典俠黑線：「又係啵……唔緊要，我而家幫你整返醒佢。」
「唔駛咁麻煩喇，你幫我執返乾淨呢到得喇。」都話今日丸子人醒嘅啦。
五分鐘過後。
丸子人再走出來：「喂，你哋行得未啊？約左人唔好遲到喎。」
字典俠心想：腦殘？
「嘩，做乜攪到啲地方咁？咦，阿生你係乜水？」
字典俠：果然腦殘。
又一輪混亂之後，佢哋三個終於可以出門口，睇清楚係「出門口」，唔代表可以安全到達目的地。
半路中途，迎面出現一個很像字典俠的人，不論身型還是外型，最重要的是連眼鏡也很相似，只是人家的眼鏡上寫着「百科」。
啲青少年漫畫成日都話，宿敵碰頭都係感覺到股特別嘅氣，唔知佢地兩個係咪感覺到對方嘅氣，不過佢哋就停咗喺度互相超對方，係眼超超個超。
ok俠問丸子人：「佢哋喺度做咩？」
丸子人：「放電呀！溝女，細路仔學野喇。」
事實上他們心裡是想着同一件事：呢條友咁樣衰真係想打獲佢！
字典俠先說話：「字典俠。」
對方也答他：「百科俠。」
ok俠又問：「今次又做咩？」
丸子人：「自我介紹掛。」
原來剛剛字典俠自報姓名是叫陣，而對方答他則是答戰，於是字典俠出招：「請問『黌』字點寫又點解？」
百科俠隨便寫了個「洪」字：「大嘅意思。」
字典俠陰笑：「錯！係解古時嘅學舍。」
百科俠不忿：「敢問閣下地球直徑有幾長？」
字典俠大汗：「……」
百科俠也來個奸笑：「一萬二千七百五十六公里。」
字典俠：「到我……」
「咁而家佢哋又做咩呀？」ok俠像是很興奮，因為他又開始嘻哈。
丸子人神情凝重起來：「獨立於天地，無視所有人，莫非……呢啲就係傳說中嘅隻揪？」
「嘩，隻揪正呀！」ok俠對空氣揮出三拳。
於是字典俠同百科俠之間嘅決戰引嚟好多途人嚟觀摩。事實上佢哋嘅決戰係好可觀的，因為平時咁有人大街大巷做show人睇，不過佢哋嘅舉動漸漸變得好擾民。無他，如果有兩個傻佬企喺條街不斷問啲，對方答唔出嘅問題問左成日，你都會覺得佢煩。
ok俠跟丸子人耳語：「咁落去都唔係辦法，諗下計好喎。」
「『奊』字點解……」
丸子人很睏：「你問我？我邊搵計，阿計阿計你喺邊？」
「黑洞點形成……」
如是者過了三天。
「『恝』字點……」佢哋同時暈左喺地。
「好似打完喇喎。」ok俠手持望遠鏡，原來ok俠同丸子人早就回鋪等了。ok俠轉身竟然見到個聖誕老人！「嘩，聖誕節未到喎，咁早出嚟派禮物？」
「派你個頭，我剃緊鬚呀，傻佬！」原來係丸子人，仲以為咁快聖誕節。
丸子人同ok俠出到去，字典俠同百科俠已經好生猛咁有傾有講，恢復力真係快，唔怪得可以成日唔瞓。
字典俠：「喂，你哋嚟得啱喇。呢個猛人嚟，帶埋佢去介紹你啲朋友認識。」
ok俠再跟丸子人耳語：「佢哋唔係唔妥對方嘅咩？」
丸子人：「呢啲咪叫『猩猩相識』囉。」
「原來係猩猩。」ok俠鎚心口。
「你哋喺度玩咩呀？仲快啲就遲到嘅喇。」字典俠好像還未察覺時間流逝。
丸子人：「都遲左三日啦，唔爭在啦。」
「三日啫係二十五萬九千二百秒。」百科俠唔知發咩神經。
字典俠黑線：「咁……我哋去飲茶。」
「就係你條蛋散要我哋等你三日下化，等我哋試下你有幾多斤兩先。」突然間出現左一班人，每個都……好異相。
丸子人拉字典俠埋一邊：「你死喇，佢哋唔認同就會殺左你，佢哋唔會被外人知道有呢個會嘅存在。」
字典俠：「咩會呀？黑社會呀？」
丸子人：「異常會。」
字典俠：「語常會？搞咩？教語法？」
丸子人：「入左會你就知。」
字典俠心想：而家啲黑社會咁樣屈人入會都有嘅。
